重阳旧俗

  白 话广州

  今日系重阳,寻晚,因为台风“圆规”嘅影响,广州重阳嘅登高点暂时关闭。

  重阳节登高爬山,系广州市民一年一度嘅例牌节目,广州人喺呢一日登高都系祈望转好运,以前亦都有唔少人系上山祭拜祖先嘅。

  喺广东,除咗清明拜山,唔少家庭仲会拣重阳呢日。重阳时节,南方已经入秋,又的确系一个适合行山嘅日子。唔似清明噉,阴雨绵绵,行两步都身水身汗。重阳节秋高气爽,祭拜祖先之余,登高揽胜,心情都会靓好多。

  喺清代,“放纸鹞(风筝)”仲系嗰时嘅重要活动。嗰啲纸鹞系用白纸粘制,翼上边有竹或者弓,仲有啲薄铜片,当佢迎风飞起嗰时,会发出呜呜响声,所以,佢仲有一个名堂,叫做“响弓鹞”。喺屈大均嘅《广东新语》入边,就记载住“广州人九日登五层楼双塔,放响弓鹞。”据讲,当时广州仲有一个习俗,放纸鹞仲寓意系放走啲灾难。喺清代嘅《岭南杂事诗钞》就记录咗呢个习俗:“重九登临意若何,游人翘首白云多。纸鸢放罢心私喜,灾难从今带去么?”

  而家,放纸鹞就冇呢种讲究啦。不过“行山转运”呢个习俗仲系保留咗落嚟,但“转运”嘅嘢就由风筝换成咗风车。

  ◎阮栩 编辑