百年前嘅月光

  白话广州

  今年中秋赏月,你想去边度呢?如今嘅广州,地方够大,夜景又多,好似小蛮腰、海心桥、珠江新城、长堤、白鹅潭……唔使忧揾唔到一处赏月胜地。但系,喺百年之前,广州主城区远远冇宜家咁大,嗰阵时嘅人,又会去边度赏月呢?

  其实旧时嘅人,口味同宜家都好一致嘅,都中意去越秀山。早喺唐代,越秀山就因为有越王台故址而吸引咗唔少文人去登高咏月;到咗清代,大家中意从学海堂(今日二中附近)入山,一路行到去至山亭(今日伍廷芳墓园一带)先至会停低等待月轮升起——听闻,多数人睇啱呢个地方,系因为当时呢度视野开阔,适合一班人坐落远眺,无论系睇月光,定系倾下计,都非常合适。

  上山赏月,通常更显清幽,更有怀古意味。相比之下,水边就热闹好多了。当年嘅荔枝湾,每逢中秋夜,两岸必会逼到爆。紫洞艇,挂住素馨花灯,价钱翻到平时嘅10倍,都未必租得到。大街小巷,街坊个个“竖中秋”:用一支竹吊住花灯、鱼龙灯、花果灯,再竖喺门口度。离远一睇,满目繁华,就连月光都几乎被掩盖。

  一年一次,人月两圆。转眼百年过去了。唔知今年中秋,你又会同边个赏月团圆呢?

  ◎梁倩薇 编辑