暑假托管

  白 话广州

  呢个星期开始,广州各个区嘅暑期托管正式开班。

  作为家长,听到暑假可以将“化骨龙”回笼呢个消息,真系举双手双脚赞成。特别系双职工家庭,平时返学已经冇时间睇住佢哋,更何况系成两个月溜溜长嘅暑假呢!以往一放假,啲家长就头痕,一系将佢哋掟俾爷爷嫲嫲呢啲长辈帮手凑,一系掟返老家。又或者开始疯狂“报班模式”,学游水、学画画、学捉棋、学羽毛球……总之,对家长嚟讲,放假期间仲费心神。有报班嘅,也要陪同;冇报班嘅又要睇住。所以,呢个官方嘅暑期托管班,真系嚟得及时。

  睇返托管嘅时间同内容,都非常友好。一般系从朝早八点半到晏昼六点左右,家长完全可以上班送去落班接返。而且啲课程都好吸引。以小北路小学呢个授课点为例,无人机、科技模型、科学发明课程,据讲好多都系参考少年宫嘅课程嚟设计嘅。价钱方面,梗系吸引啦。呢啲课程一般都系50蚊一次,每次个半钟。最贵嘅无人机同科技模型课程,只系贵多二三十蚊,真系抵食夹大件。难怪好多家长话,睇到都心郁郁。

  暑期托管班已经上咗两三日,家长个个都话好。希望托管班可以一直办落去,让呢啲学生哥嘅假期更有意义。

  ◎阮栩 编辑