新智能公厕

  白 话广州

  中意去生物岛跑步同游玩嘅市民有福啦!新闻话,广州首个可以做健康检测嘅智能公厕驿站喺呢度试点使用。睇下介绍,原来呢个唔单止系公厕,仲系个驿站,入边有自动售卖机、WIFI、免费书籍。市民既可以嚟“方便”,又可以休憩。

  呢间公厕驿站最新鲜嘅,就系可以帮你做埋健康检测。原来,佢入边有间健康小屋,配备咗啲急救药品,好似纱布、创口贴、酒精、消炎药呢啲,仲有除颤仪俾市民救急。呢啲设施,都系免费使用嘅。而可以帮市民做健康检测嘅,系一个尿常规便民检测箱。街坊可以喺“方便”时顺便做个尿样检测,只要按照上边嘅指引,扫描小程序,半分钟左右就可以收到尿常规嘅14项检测数据,仲会提出健康建议添。

  讲起呢个智能公厕嘅“黑科技”仲有好多,好似智能消杀嘅机器人,可以自助消毒;自动红外线测温仪,可以实时将每个人嘅体温结果传送到电子屏上边;仲有扫码使用嘅冲凉房,市民跑完步喺度就可以冲个凉……

  呢种咁先进嘅智能公厕,试点成功咗就会喺黄埔区全区推广,希望到时可以推广到成个广州市区啦。

  ◎阮栩 编辑