“重建”上下九

  白 话广州

  前段时间,上下九第十甫历史文化街区保护利用规划出炉。消息一出,当然有人赞好有人反对。我属于赞成方:过年期间行过一次,沿街商铺冇想入去逛下嘅欲望,甚至连荔湾广场都冇入去就匆匆“撤退”喇。

  规划里边,大家对荔湾广场要唔要拆、路面要唔要重铺麻石呢两项讨论得最多。撇开荔湾广场种种奇闻轶事不谈,呢个地方依家真系同当年鼎盛时期落差好大。以前我哋系点样逛荔湾广场嘅呢?逐条逐条“冷巷”扫过去,隐藏其中嘅店铺每一间都唔放过,唔买都要入去睇下。因为同其他场外店铺相比,呢度嘅店铺更加潮流上档次。可能有人话“今时唔同往日”,不过无论边个时候,行街都系女生嘅日常乐趣。荔湾广场同其他新起嘅某某广场相比有几冷清,恐怕真系要揾下自己嘅原因喇。

  至于路面铺麻石,多数人反对系认为佢排水唔好。但其实排水好唔好真系同麻石冇乜关系,以前旧西关嘅横街窄巷,铺麻石一样去水。上下九呢段路嘅骑楼如果可以修得更好,路面铺埋麻石就更加有味道喇。

  当然,一个历史文化街区要做得好,唔系改下外观铺下路面就得嘅。点样重新树立上下九喺街坊心目中嘅地位,仲有好多嘢要做。

  ◎李月婷 媒体人