阿婆牛杂

  白话广州

  前一排,芳村陆居路嘅阿婆牛杂重新开档,唔少拥趸都走过去捧场。话实,广州嘅牛杂档唔少,但做到阿婆牛杂咁重新开档会上报纸,然后又有一大班人过去排队揾食嘅,就真系得佢呢一档喇。

  谂返起读小学嘅时候,学校门口都有一档“阿婆牛杂”。呢位阿婆个档口系个微型士多,夏天卖雪条,秋冬卖牛杂。放学嘅时候,佢个档口周围都系人。以前食牛杂冇依家咁讲究,阿婆卖嘅都系牛肺同萝卜。一串串,用竹签穿住,牛肺一毫纸一串,萝卜五分钱一串。有时卖得快,阿婆就要喺个煲里边捞牛肺萝卜,呢个时候就总系谂:“唔该剪大旧啲啦。”我成日去帮衬呢位阿婆,除咗因为佢嘅牛杂煲得够入味之外,佢自制嘅蒜蓉辣椒酱亦都好好味。不过,啲家长见到总系会话:“哎呀,佢把铰剪都唔知有冇洗干净嘅。”我哋呢班细路边度会听,个个都话“大菌食细菌,食咗当补品”。

  依家嘅牛杂档,每一档都依然拥有一把揾食嘅铰剪,除咗宣传自己用料干净之外,酱料都系吸引食客嘅必杀技。食正宗嘅靓牛杂,呢啲嘢缺一不可。唔知大家有冇发现,依家好多茶楼都开始卖牛杂。不过,食牛杂梗系要食街边档先够惹味,要么捧住个碗一路行一路食,要么就缩喺路边张台度食。坐喺茶楼食,就少咗一番风味喇。◎李月婷 媒体人