花都寻香

  白 话广州

  呢个清明假期,除咗传统嘅拜山祭祖节目,好多人都会去踏青,同大自然亲近下。时下,广州周边就出现咗唔少文旅主题公园、度假村。

  系花都,就有一个以香为主题嘅度假村。呢度啲植物好多都系芳香型嘅,呢度有檀香、降真香、广藿香、芸香、降香黄檀、山茶花、山苍子、黄杞、水翁……据讲,呢啲芳香型植物有上亿株咁多,种类多达327种。因为呢个咁得天得厚嘅环境,呢度啲原住民好早以前就喺度制香。

  据花县志记载,呢个制香工场叫做“香粉碓”,当地土人系度建造水车,设机舂香粉,一日可以生产六七百斤香粉咁多。上个世纪五十年代,呢度啲传统制香就逐渐没落,慢慢荒废。时至今日,就只系净翻四个遗址系度,好似水车转轴、连体臼、碓嘴呢啲石构件保留得好完整。自从呢度做咗主题度假村之后,管理者就好有心噉复原咗成个制香工坊,还原古法制香嘅工艺流程,专门请咗制香嘅工匠过嚟,修复咗水碓,引山泉水嚟带动碓臼嚟舂香粉。

  嚟呢度玩,可以逐一科普晒呢度所有植物嘅知识,皆因几乎每樖植物都有“身份证”。如果仲未过瘾,大细朋友仲可以跟啲制香师傅现场学下点配香。◎阮栩 编辑