血泪洒黄华

  白 话广州

  黄华路区域改造方案出炉。其中,“血泪洒黄华”石碑得以保留,周围划作公园绿地,等呢个历史遗址有一个更好嘅展示环境。

  提起“血泪洒黄华”,可能连一啲老广州都未必知道。但只要讲起日本仔轰炸广州,就几乎无人不晓。话说,1938年广州沦陷前夕,细细地一条黄华路,当时叫“黄华塘村”,五六月份就起码遇到16架次以上嘅轰炸。有一次,村民将遇难者尸体移到办红白喜事嘅“西厅”安放,数咗一下,居然有89具之多——你话,一条村先得几多人?一炸就死咗咁多,可见日本仔有几残暴呢。

  事后,老村长曾勤牵头立碑,亲自撰文,于是就有咗今日嘅“血泪洒黄华”石碑啦。

  至于日本仔点解要针对黄华塘村,讲得比较多嘅系“附近有兵工厂,所以引来攻击”——当然,呢个说法系有根据嘅。但惗深一层,比如翻查《广州市被轰炸点标识图》就会发现:当时日本仔大量投弹点都系民用建筑,诸如中大校园、中山纪念堂等等。无论有兵无兵,佢都要炸你。

  所以,讲到尾,呢件事就系侵略者手段残暴,滥杀无辜,先造成咗中国人民嘅悲剧。而呢座石碑,就系历史无法磨灭嘅铁证。

  ◎梁倩薇 编辑