包粽

  白 话广州

  又到咗食粽嘅时节,前两日阿妈包咗十几个,叫我带返屋企做早餐。嫌麻烦,冇带。阿妈呻咗句:“包嗰个都唔嫌麻烦,叫你食都懒?!”

  包粽的确好麻烦,尤其系准备工夫——买好粽叶,洗干净之后再攞出去晒一日。晒干咗,又要用水浸够一日,浸到佢变软身。浸粽叶嘅时候,要一齐浸糯米、花生、绿豆。然后当晚将肥肉切好,用五香粉腌过夜。第二日,将浸好嘅几样食材倒入个大盆里边搅匀。准备工夫做好,阿妈担张凳仔坐喺厨房,正面摆糯米花生绿豆,左边放粽叶,右边放肥肉咸蛋黄,开始包粽。

  睇过阿妈包粽,但至今我都未学识点样折粽叶先唔会漏馅,呢样最考工夫。睇妈妈几下手势,折好粽叶,落糯米,放肥肉,藏好只咸蛋黄,掹条绳好快扎好只粽,真系睇到眼花花。可能因为做起身麻烦,所以每次妈妈都会包好多。嗰个月,基本都系食粽做早餐。

  咸肉粽蒸熟之后返煎最香口,碱水粽就系另一番滋味。食碱水粽,一定要有白砂糖。喺啲糖未融之前落口,碱水同甜味配合得恰到好处。后来唔知边个发明喺碱水粽里边放莲蓉,可能系为咗方便大家唔使落糖吧,反而唔系咁中意——食碱水粽,就系为咗嗰啖砂糖。◎李月婷 媒体人