呢啲“瓜”唔食得

  白话广州

  上次讲咗某啲瓜菜嘅广州话别名,今日嚟讲下唔食得嘅“瓜”。

  大家可能觉得出奇,咩嘢“瓜”唔食得呢?因为呢啲“瓜”系用来笑人或者系闹人啰。

  闹得最多嘅系“蒸生瓜”。按字面理解,“蒸生瓜”就系“瓜蒸唔熟”。呢个“唔熟”就系呢句歇后语后一句嘅意思——“唔淑”。所谓嘅“唔熟”“唔淑”就系唔够成熟唔够淑女。所以,“蒸生瓜”就系用来笑啲女仔“大唔透”。

  仲有一种系“水瓜”。水瓜可以食,不过就千祈唔好用水瓜嚟“打狗”喇。试谂下,水瓜咁脆,边可以用来做“武器”?“打狗”嘅代价,当然就系“唔见咁橛”(“橛”系一节一节嘅意思)。喺广州话里边,“水瓜打狗”系用嚟比喻做某件事损失惨重。北方都有同类嘅歇后语,比如“肉包子打狗——有去无回”。

  至于“茶瓜”,呢种系用来送饭嘅香口酱瓜。有啲病人觉得口淡,用佢嚟送饭。所以,有人就用“茶瓜送饭”形容嗰啲身体唔健康嘅人,于是就有咗“好人有限”呢句歇后语。大家唔好睇佢讲嘅系“健康”,其实系暗指呢个人嘅人品,“好极有限”。当然喇,要听得明呢啲字底下嘅意思,粤语可能真系要八级先得喇。

  ◎李月婷 媒体人