夜茶印象

  白话广州

  新闻讲,中秋期间,广州一啲酒楼夜茶生意兴旺,令人似乎睇到呢种上世纪八九十年代流行一时嘅饮食文化有“回温”嘅迹象。

  上世纪八九十年代,饮夜茶系广州一种时髦嘅消费方式。倾生意嘅、拍拖嘅、亲友聚会嘅,都系钟意“出嚟饮夜茶”。喺小弟印象中,广州鼎盛时期嘅夜茶有“两多一平”——

  一系茶客多。夜茶开市系晚黑九点,到十一点收市。好多酒楼门口,晚黑八点几就企满等饮夜茶嘅人,等踏正九点,酒楼服务员一“开闸”,茶客就一窝蜂咁拥入去,好似唔使钱咁。

  二系茶点多。当年嘅夜茶虽然亦系茶市,但茶点比早茶多,因为要顾及中、青、少吧。比如小弟长期打趸嘅人民中路某酒楼,夜茶点心就有上百种,除咗干蒸、凤爪等常规点心外,仲有牛三星、棉花糖、雪糕呢啲“非主流”嘅嘢食。

  三系抵食。以前嘅夜茶有一个特点,就系所有点心一个价,记得多数酒楼都系定3蚊,认真抵食夹大件。亦正因为平,又冇最低消费,所以有唔少茶客两条友使十蚊八蚊就可以喺酒楼叹足两个钟冷气。

  饮夜茶曾经系广州一个特有嘅饮食文化,可惜式微多年。宜家有“回温”迹象,系好事嚟嘅。希望呢壶夜茶早日煲返滚啦。◎阿六 律师