跌倒揦番拃沙

  白话广州

  “呢个包兴,跌倒都识得揦番拃沙......”喺林兆明所讲嘅经典古仔《七侠五义》里边,讲到包公嘅管家包兴点样靠整蛊嘅招数协助包公上京赶考时,用咗呢句盏鬼嘅广州话。

  喺广州话里边,唔少俗语嘅意思,从正面同反面都讲得通,“跌倒揦番拃沙”就系其中之一。一个人跌跤,系伤心嘅事,不过就算趴低,都要谂下点样喺地下搵返啲有用嘅嘢,所以揦番拃沙就冇错啦。呢句俗话就象征,就算失败亦要想尽办法减少损失,攞返些少收获。上面讲嘅包兴,就系呢种态度,遭受挫折亦设法扭转局面。呢个,系正面、积极嘅人生态度。试问边个唔会遭受失败,但系能够怀住“揦番拃沙”嘅心态对待,而唔系破罐破摔!

  不过,呢句话有时亦有另一层意思,就系指明知唔啱,都唔知承认同改正,死都要攞番啲面子。呢种情况下,“跌倒”就系形容一个人理亏。其实,错误亦系生活中难免嘅,只有鼓起勇气面对、承认,先可以有力量去改正。咁,就需要一个人有谦虚、大度嘅胸怀。如果只谂住“揦番拃沙”,即系表面上挽回咗自己嘅面子,但永远都唔会有进步。

  所以话,俗语唔俗,都系人生嘅道理。

  ◎闻歌 媒体人