雅荷塘同荷花无关

  白话广州

  上周五小弟写咗篇《雅荷塘小学今昔》,有几个朋友睇到后,对“雅荷塘”呢个地名好感兴趣,觉得好有诗情画意。

  唔止第一次听人咁赞呢个地名喇。“雅荷塘”呢三个字“的而且确”可以令人联想到“接天莲叶无穷碧,映日荷花别样红”“小荷才露尖尖角,早有蜻蜓立上头”嘅景象,甚至可以将人“带”入到朱自清嘅《荷塘月色》里面。

  雅荷塘位于越秀区德政北路,系一条横穿德政北路东西走向嘅巷仔,嗰一带传统上就叫做雅荷塘。从字面上睇,大家都觉得雅荷塘呢个名应该同荷花、荷叶同埋荷塘有关,但事实上系无关嘅。

  小弟当年就住喺离雅荷塘十步之遥嘅仰星后街,嗰时就听讲过呢个名嘅来历。

  话说古代嗰时,当地住咗一个阿婆,冇人知佢叫咩名,佢有一个冇名鱼塘,街坊就叫呢个鱼塘做“阿婆塘”。后嚟有人喺鱼塘度捞到一个观音像,大家就捐钱起一座庙嚟供奉观音像,阿婆捐嘅钱最多,写捐钱人嘅名时,大家先知道阿婆叫做黄雅荷。因为个观音像系喺阿婆个鱼塘度捞到嘅,所以街坊就将鱼塘叫做雅荷塘。

  经过咁多年嘅时代变迁,“雅荷塘”嘅“塘”早就冇咗喇,留低嘅系一个可以令人遐想嘅地名。◎阿六 律师