超级医生

  白话广州

  新闻话,一个9岁嘅细路,喺南航飞广州嘅飞机上突发过敏。好在,同机嘅钟南山院士闻讯赶来,为细路做咗一番检查,确认佢无事先至离开。好多网友话:“呢个细路,今次挂到‘超级专家号’咯!”

  “超级专家号”系咩概念呢?就系你平时好难挂到嘅专家号。钟南山嘅号抢手到一放出来就无晒,要佢亲自同你望闻问切,简直难过中奖啊!

  钟南山呢份名声,好多人都系通过“非典”了解到嘅。当时,病情来势汹汹,局面令人恐慌,就喺呢个时候,钟南山一句“将病人送来我呢度”,俾咗市民好大嘅信心。“非典”令钟南山声名大振,但事实上,呢位妙手仁心喺呼吸病学专家,早喺上世纪90年代就因为《广州日报》一篇《南山风格》而被广大市民所认识。呢篇文章报道咗当年钟南山去英国深造嘅往事:为取得第一手数据,佢用自己做试验,连续吸入一氧化碳,反复抽血测定浓度,最终搞到自己天旋地转,几乎无法支撑——最终,试验获得咗成功。

  呢种“南山风骨”最终令佢获得咗同行嘅敬意,亦获得咗医学上嘅巨大成就。如今,钟南山亦随住佢嘅种种故事,成为咗广州乃至中国嘅一个骄傲了。

  ◎梁倩薇 编辑