菊湖云影

  白话广州

  古时候嘅广州,讲佢系水城一啲都冇假。因为佢南面系海(珠江),周边系有纵横交错嘅河涌、溪流,除咗呢啲,点可以少到湖呢样嘢。

  喺北宋个羊城八景入边,有一个景就叫做“菊湖云影”,呢个湖就系当时广州城最大嘅一个湖啦。巴闭嘅系,佢仲系一个人工湖。《广东新语》就好详细噉记载咗呢个湖嘅开挖过程。喺三国嗰时,当时嘅吴国刺史陆胤了解到广州临近大海,每到秋天啲海水就会倒灌,连珠江水就会有咸味,根本就唔适合饮用同耕种。于是陆胤就将白云山嘅山泉水引到越秀山,其中一条支流喺小北低洼地汇聚成为一个湖,佢就系菊湖啦。据讲菊湖挖好嗰时啱好系秋冬时节,湖周边啲野菊长得好茂盛,所以就起咗呢个名。

  而菊湖嘅建设直到唐代都仲未停过。唐代广州节度使卢钧继续扩建,佢加筑咗三百几米嘅堤坝,菊湖喺嗰嘅时候最终形成,成个湖差嘅面积大概有4平方公里。因为菊湖够大,时常见到天上白云嘅倒影,久而久之就成咗一景。

  可惜嘅系,到咗南宋,由于天气干旱,白云山嘅泉水逐渐减少,唔够流入菊湖。呢个湖就慢慢噉干涸,好快就消失咗啦。而家,只有好少嘅地方留住嗰时嘅痕迹,比如麓景路附近的上塘村和下塘村,黄华路嘅黄华塘,洪桥街道嘅湛家园。◎阮栩 编辑