山泉同美食

  白话广州

  新闻话,一位老人家上白云山攞水,唔小心跣亲搞到骨折,认真阴公。依家系雨季,各位老人家出门,尤其系去行山嘅时候要注意。

  我估呢位老人家系土生土长嘅广州人。点解?因为佢对白云山嘅山水情有独钟咯。记得细个嘅时候,我爸爸每到星期六日都要去白云山跑一转。每次去,三五个空水樽系必定嘅“装备”——孭住呢几个水樽,跑上半山接山水再跑返屋企。接山水做咩?用嚟冲茶煲汤,佢话咁样啲茶水汤水先至“够甜”。

  嗰个时候好兴上山攞水,后来为咗保护生态同环境,就禁止市民游客攞水喇。依家睇嚟,去白云山攞水依旧系“禁而不止”。广州人为咩对白云山嘅山水“迷恋”到咁嘅地步呢?咁就要从广州人嘅饮食习惯讲起。大家都知道广州人把口好“刁”,食材同原料样样都要新鲜,就连用水都有讲究。唔知大家有冇听讲过,好多人话广州啲水系“热底”,天然嘅山水先至够“正气”。

  其实,广州一啲比较有名气嘅小食都同白云山嘅山水有关。第一种系白云猪手。白云猪手醒胃可口,佢唔肥唔腻嘅“秘诀”据讲系因为浸过白云山嘅山水。第二种系沙河粉。呢种粉啱啱“发明”嘅时候,用嘅就系白云山嘅山泉水。后来批量生产,伍仙桥嗰间沙河粉厂仲特登喺山上边引条水管落嚟整米浆添。

  ◎李月婷 媒体人