高端百货嘅代表

  白话广州

  广百集团要合并广州友谊商店,一度引起咗街坊对于友谊商店“会不会改名”嘅担忧。不过,友谊商店好快就回应话:自身同广百嘅发展路线唔同,广百会拓展二三线城市,而友谊商店则深耕本地,继续行高端路线。

  其实,呢份担忧,对于熟悉友谊商店嘅街坊来讲系无必要嘅。广州友谊商店从诞生之日起就系“高端百货”嘅生招牌,一向同“奢侈、精致”呢啲字眼分唔开。广百合并友谊之后,只有将友谊嘅品牌效应发挥出来,先至算系如虎添翼。如果无啦啦改咗佢个名,咁就晒咗呢间老字号啦。

  广州友谊商店出身有几高端?其实,从“友谊”两个字就知道,呢家商店1959年诞生时就属于特种涉外商店,好长一段时间只招呼外国友人。所以,但凡矜贵稀缺嘅货色都会放喺呢度卖。比如玉雕、牙雕、陶瓷、刺绣、古玩……檀香扇可以卖到三四千蚊一把,而且出咗呢间商店,你都唔知去边度揾。

  1981年,为咗适应外宾购物习惯,友谊商店又开咗全国第一家超级商场。开市嗰日,市民蜂拥而入,就算知道要外汇券先可以消费,好多人都坚持要逼逼逼,无他,就系为咗睇吓呢个新奇事物咯。

  就系咁,友谊商店嘅“新潮奢侈”就成为咗一个牢不可破嘅印象。此后几十年,佢一直如此,成为咗广州高端百货最重要嘅重代表。

  ◎梁倩薇 媒体人