鸡手鸭脚

  白话广州

  “俾我来搞啦,睇你鸡手鸭脚咁”,喺超市度一对老人家整理紧刚买来嘅嘢,个婆婆就同个老爷爷话。广州人中意用“鸡手鸭脚”形容人笨手笨脚,唔够麻利,点解呢?

  原来,鸭脚长着蹼,连住几个脚趾,虽然识游水,但行路就唔够灵活;而鸡嘅脚冇呢个缺点,不过就唔识游水。所以,鸡同鸭嘅脚,都俾人认为系“笨”嘅象征。 鸡喺广州人嘅心目中,唔单只系一味好餸嘅材料,而且仲系好多俗语嘅素材。鸡虽然笨手笨脚,但有样嘢就好灵活,而且又快又唔会中断,就系佢个把嘴。“鸡啄唔断”,就用来形容有啲人讲起话一轮嘴,唔想停。你谂一下,平时鸡啄米嘅样,系咪持续不断?

  同鸡有关嘅仲有几句俗话,亦好形象咁讲明咗一啲做人嘅道理,或者讽刺社会上某啲可笑嘅人或事添。譬如,“鸡春咁密都菢得出仔”,话俾大家知,唔好以为自己做嘅嘢冇人知道,就算点密实,都会有泄漏嘅可能。“鸡髀打人牙铰软”,鸡髀从来都系一只鸡最好食嘅部分,用佢来打人,实定有去冇还。呢句话意思就话,攞咗人哋嘅着数,通常会影响公正嘅判断。而“鸡蛋摸过轻四两”,就生动咁讽刺咗嗰啲贪得无厌嘅人,俾佢摸过,鸡蛋都要蚀抵,你话得唔得人惊?

  可见,鸡唔单只美味,仲系白话中嘅杰出“主角”添。

  ◎闻歌 媒体人