冇耳茶壶

  白话广州

  一只茶壶,冇咗耳,会变成乜嘢?首先会变成一句广州话俗语。“冇耳茶壶,得把嘴”,广州人用来形容嗰啲净识得车天车地,但冇实际本事或者贡献嘅人。旧阵时嘅茶壶,大多数只有一只提手,亦即是“耳”,提手唔见咗,就真系“剩低把嘴”,所以呢句话讽刺得十分形象。

  广州人素来务实,真正系“唔睇广告,睇疗效”嗰种。所以,生活中经常夸夸其谈嘅人,通常都瞒唔过街坊嘅眼睛。除咗冇耳茶壶之外,仲有好多广州话俗话,有同样或者近似嘅意味。譬如“无烟大炮”。大炮通常会发烟冒火,如果冇烟,咁就只系“得把声”,所以无烟大炮,亦用来形容啲净识得认叻,冇真实本事嘅人。仲有“冇柄士巴拿”,士巴拿即系扳手,如果冇咗手柄,系唔系剩低一棚牙? 呢几句俗语都相当盏鬼。

  由此可谂到,对于自己嗰一言一行,人哋唔单只会睇得清楚,仲会攞出来比较。相比之下,我哋更加睇重“行”,而唔系“言”。不过,呢样嘢亦唔系表示“言”唔重要,只不过系话,说话要适度,要谦虚,唔好吹嘘自己,更唔好喺事情未办妥前就夸下海口。今时今日,有啲旧观念亦需要适应开放嘅时代。喺竞争激烈嘅社会,酒香都怕巷子深。而良好嘅沟通、宣传,出色嘅语言艺术,经常会产生事半功倍嘅效果。

  ◎闻歌 媒体人