流花记忆

  白话广州

  最近广州搞咗个“流花记忆”征集活动。呢度嘅“流花”,唔系指流花湖公园而系广交会流花展馆,大家有咩古仔或者实物嘅都可以试下提交。

  依家提到做展会,大家必然会谂起琶洲。除咗交易会之外,但凡有咩展会博览会都喺呢个地方进行。记得琶洲展馆啱啱开张嘅时候,遇到有展会,大家都会问“系喺琶洲定系旧交易会啊”,依家就唔会再问喇。不过,最早期嘅广交会并唔系全部喺流花展馆举行。喺海珠广场附近,有两个旧广交会会址,一个系侨光路陈列馆,一个系今日依然迎客嘅起义路缤缤广场。呢两个会址既单独用过,亦都试过一齐使用。后来因为展位紧张,于是就喺当时仍然系郊区嘅流花路上边起咗一个展馆,就系流花展馆喇。

  流花展馆平地而起,令到羊城新八景里边出现咗“流花玉宇”呢个新景点。

  对流花展馆嘅记忆,依家我仲记得嘅系细个嗰时同妈妈去逛——好似出城一样咁高兴,每次去都可以睇到新奇玩意,又可以食平时食唔到嘅零食。学生时代嘅第一份兼职都系喺呢个展馆开始——以前春秋两季广交会,呢度嘅兼职机会特别多。

  以前我觉得佢已经够晒大,喺入边逛一日都逛唔完。广交会要搬过去琶洲嘅时候仲觉得奇怪:咁大嘅地方仲唔够?依家,大家都知喇,真系唔够。◎李月婷 媒体人