饮茶食饭限时

  白话广州

  “急急脚咁,饮餐茶都唔够时间叹啦!”新闻话,广州一家老字号餐厅出咗条规定,就系食饭限两粒钟。呢样嘢,引来咗街坊嘅唔同睇法。有啲就话,限时搞到食客擒擒青,根本享受唔到饮茶食饭嘅乐趣,不如唔食。有啲就认为,两粒钟食乜嘢都食晒啦,早啲埋单走人,咁其他客人唔使排长龙,冇乜嘢唔妥。

  针对呢个争拗,我哋就做咗个小调查,发现有六成街坊仲系赞成限时嘅。加阵外出食饭,好啲嘅酒楼,抢位、攞号、排队,系常见嘅事。有啲知名嘅老字号酒楼,你要饮早茶,排两三个钟闲闲地。所以,好容易理解,店家点解会限时,亦点解会有咁多街坊亦赞成限时。话时话,叹茶,确实系广州人嘅一大习惯,去啲稍为冷门嘅茶楼,饮茶直落早午晚,应该都可以。不过,如果去呢啲“网红”茶楼,坐上一个上午,唔单只商家赚唔到钱,而且其他食客亦唔满意,确实唔多妥。

  不过,话又讲返转头,亦有街坊话,限时都得,不过我点个餐,你上菜亦应该限时,譬如落单后半个钟上齐,咁先啱。呢个亦有道理。加阵有啲茶楼,因为缺人手,或者服务跟唔上,上菜嘅速度真系唔敢恭维。所以。街坊讲得冇错,既然限时,咁就大家都要对等咁“限”,咁先保证食客有充足嘅时间食完,餐厅先能够达到基本嘅服务标准。

  ◎闻歌 媒体人