名门蔡李佛

  白话广州

  26日,岭南武术非遗文化周闭幕,推动武术传承传播嘅话题受到关注。其中,作为南拳名门之一嘅蔡李佛拳再次引起议论。

  蔡李佛拳最得意嘅地方在于佢个名,听起来,既唔似人名,又唔似地名。究竟系一个点样嘅组合呢?其实,蔡李佛3个字,系来自创始人陈享嘅3位老师:蔡福(蔡家拳)、李友山(李家拳)同陈远护(佛家拳)。陈享从7岁起先后拜呢3位为师,修习武术同医术。后尾开班授徒嘅时候,人哋问佢乜嘢门派,佢就将3位老师嘅拳术集于一体,开创咗蔡李佛拳派。

  当时,好多武术门派都文武兼修,就如大家熟悉嘅黄飞鸿,唔单止弘扬岭南武术,仲开办咗宝芝林医药馆,留低跌打、防暑凉茶等配方,造福咗一方百姓。

  同样,作为武术门派嘅蔡李佛,当年亦以行医为主,同时免费教拳,后来越做越大,就连广州甚至东南亚都有自己嘅拳馆。

  以前,我听屋企一位长辈讲,当年林则徐请陈享帮手训练水师,由此,陈享亦将蔡李佛拳带到广州。19世纪兵荒马乱,匪患肆虐,老百姓急需一技之长保护自己,所以学武嘅人特别多,广州嘅拳会亦相当兴旺。

  如今,社会稳定咗,习拳防身嘅重要性已经唔咁强了,但强身健体嘅传统习俗,依然一路沿袭落来。

  ◎梁倩薇 媒体人