女球迷“扫盲”

  白话广州

  世界杯已经打到小组赛第二轮,越来越多女球迷也开始关注赛事。上星期阿六讲咗下粤语讲波术语里边嘅“食”字,今日我就来同女球迷科普下讲波佬其他常用词汇。

  每个人睇波嘅习惯唔一样,尤其系拣台方面。有人中意睇本地台,有人中意央视,又有人中意睇“哑波”,各有各爱好。

  讲到粤语讲波,好多人都中意何辉同陈宁。不过地位最高嘅讲波佬,应该系已经过世嘅无线电视记者伍晃荣。当年佢一句“波系圆嘅”,到依家都系球迷心中嘅经典——各位靓姐,呢句说话使用率非常高,尤其系刚开场某一队入波嘅时候——呢句即系话,唔系入咗波就可以定输赢,裁判未吹鸡,胜负都仲未分,依然有无限可能。

  除咗呢一句,讲波佬讲一场波都中意用下边呢啲词汇。例如“插水”,指球员跌低扮嘢博罚球;“插花”,形容球员左穿右插,避开对方球员拦截;“执死鸡”,形容入球补中;“单刀”,指球员单人带波射入(呢句有典故,出自《三国演义》“关云长单刀赴会”)……

  你睇下,用粤语讲波几生鬼,几传神呢!而且仲符合广州人嘅口味。各位阿姐学识呢几句,基本上都可以睇得明一场波,而且可以快速咁get到场内情况。呢个时候,就唔使怕啲男同事笑你净系识得德国队嗰几个靓仔球星啦。

  ◎李月婷 媒体人