过年歇后语
过年歇后语

  白话广州

  好快就要过年了。一啲旧习俗、老式嘅歇后语又会被重新提起。至今读起上来,都令人觉得妙趣横生。

  例如“年三十晚”呢个时刻,由于地位重要,因此亦经常被老百姓攞来做文章。例如自古就话:年三十晚谢灶——好做唔做。意思即系话,到咗二十三日小年夜嗰一日,家家户户都会谢灶,已成定例。如果呢一日无谢灶,反而要拖到年三十晚呢个“不宜谢灶”嘅日子,咁就真系无无谓谓,多此一举了。

  此外,仲有人话:年卅晚出月光——世无其事。意思系话,月相变化,从来都系月中为盈,月末为朔,未见过三十晚都会有月光嘅,就算系过年,亦都唔例外。

  “岁晚煎堆”,呢句就好多人都知道啦,“人有我有”嘛,喺广州生活嘅街坊,边家唔会炸定啲煎堆油角过年呢?呢份烟火气息,正系广州年味所在。

  之后,到咗年初一,好多人都会彼此拜年,于是就有“年初一拜年——大家咁话” 嘅说法。即系讲,贺岁时嘅好话,讲来讲去都系“恭喜发财,万事胜意,龙马精神”嗰几句,你系咁讲,自然我又系咁讲,大家都一样啦。

  一片喜气之中,比较落寞嘅系“隔年通胜”,因为“唔值钱”咯!只不过,旧嘅唔去,新嘅唔来,随住又一部通胜开启,新嘅一年,新嘅希望,又再铺展喺大家面前啦。

  ◎梁倩薇 编辑