疍家俗语

  “你走唔甩嘅,等下就疍家婆打仔。”喺小区度有位阿婆同个孙仔玩游戏,笑住追个孙仔。“婆婆,你点解要打我呢?”孙仔问。“我点会打你呢,疍家婆打仔系话你冇定好走,迟早俾我捉住。”个阿婆话。

  原来阿婆讲嘅系广州话歇后语:“疍家婆打仔,睇你走得去边度。”旧阵时广州嘅疍家,大人细路活动嘅地方都系只船咁大。一旦细路唔听话,惹起大人发火,真系冇定好匿。呢句俗话,经常喺游戏中出现,形容咗被围困嘅格局。

  翻查下资料,跟疍家有关嘅俗语仲有唔少,譬如,“疍家鸡,见水唔得饮”,形容好似船上嘅鸡咁,口渴时,对成条江嘅水可望不可及。又如,“疍家婆攞蚬,第二筛(世)”。呢句系话,旧阵时疍家人用筛捞蚬,第一筛要拨去厚厚嘅沙石,第二筛落去先会捞到蚬。筛,白话同世相近,所以就俾人开玩笑,形容某样嘢希望渺茫。

  呢啲俗语,唔单只盏鬼,仲喺一个侧面,睇到旧阵时疍家嘅生活:除咗打鱼,佢哋嘅生活范围大多时候只系一只细细嘅船上。依家,广州嘅疍家大多数都上岸居住,生活条件同旧阵时相比已经天上地下。不过,作为广州水乡文化嘅一部分,疍家呢个群体为广州嘅文化留低咗唔少有价值嘅嘢,俗语、咸水歌、疍家古仔等等都系。

  ◎闻歌 媒体人